La politica 2.0 dl Movimënt 5 Stëres Ladin

La politica é bele da agn jüda a de mal y sëgn era propi tl laûr da fraidì. Cara é pa la gauja de chësc svilup pervers de na cossa ponsada ma por le bëgn dla jënt. La gauja é öna sóra, le gnì a manćé di ideai etics y morai dla sozieté y tl medemo tëmp le crësce di interesc individuai y personai dla jënt. Sce da öna na pert ùnse politics che ne fej nia ater co laurè por sü interesc, él dal’atra pert inće porsones che dà süa usc a politics che po ti garantì vantaji personai. Chësta combinaziun maradëta à portè a en sistem,  a chël che nos cun gran superfizialité ti dijun tres ćiamò democrazia. Democrazia vëgn dal grech y ô dì podei o sovranité dl popul. Bele plü dadî an odü ite che na democrazia direta, olache döta la jënt podô partezipé ales dezijiuns politiches n'ê nia poscibla. Porchël ên passà a na democrazia rapresentativa, te chëra che le popul chir fora porsones, che dess rapresentè süa orentè. Rapresentè l’orentè dl popul. Ponsun mo en pü’ dô. Pon di che i politics d‘aldedaincö rapresentëia le popul? Fajun na proa. Le popul, sigü plü dl 80%, é dla minunga che i politics davagna massa. Porchël pon dì che la orentè dl popul foss chëra de arbassè le paiamënt ai politics. Ëis os en iade aldì che al sides gnü damanè ala jënt tan che en politich, por ater dipendent diret dla jënt, dess davagné? Ćiamò na domanda, sce i politics fajess la orentè dl popul, adoréssun spo na lege sön la democrazia direta, che dij avisa can, co y  por ciodi che la jënt dess avei la poscibilté de dì la söa? Por dërt fóssel ma da fà l’orentè dla jënt y basta. Al plü podéssun rajonè sön les tecniches da enrescì la orentè dla jënt, mo chilò ne val sigü nia debojëgn da inventè val’ de nü. Ponsun al internet de secunda generaziun, i blogs, i social netwoks y i.i.

Sön la basa de chëstes reflesciuns à le Movimënt 5 Stëres Ladin invié ia en proiet che dess tl mëter man gnì apliché a livel sperimental ala picia realté ladina mo che n’à, sce le resultat sarà bun, teoricamënter degönes limitaziuns de aplicaziun. Al se trata de na plataforma de democrazia direta tres l’internet, che dess garantì la partezipaziun dla jënt ales dezijiuns politiches.

En grup de tecnics informatics interessà ala politica à bele metü man da laurè a cösc proiet. Les fondamëntes informatiches dla plataforma se basëia sön na software opensource (daverta y lëdia) bele esistënta , plü avisa liquid feedback y la strotöra dla plataforma implementëia en model de democrazia online (OLD, OnLine Democracy) de chël che podëis lì valch deplü sön la plata www.facebook.com/M5SLadin.

Josef Pedevilla, Movimënt 5 Stëres

Mi impëgn politich por la Comunité Ladina

Les motivaziuns por mi nü impëgn por la politica à raîsc sotes. Dal 1995 al 2000 sunsi stè te Comun da Balsan desche rapresentant dla Lista Ladins. Plüomanco tla medema perioda sunsi stè Presidënt dl SPELL. Bele te chisc agn de ativité por la Comunité ladina al metü man da madorì te mè na convinziun che do plü de diesc agn de lontananza dal ativism politich é gnüda tres plü sterscia: Iö ne me sënti nia de fà pert de na mendranza. Le conzet de mendranza é en conzet stlüt, vedl y dala ria cira. I proi da splighé mia idea cun na domanda: po na porsona fà pert de deplü mendranzes? Almanco tla legislaziun provinziala n’é chësta poscibilité nia dada. Por ciafè en post tl’ aministraziun publica mëss un se detlarè ladin, todësch o talian. Ciodi messessi pa iö desche ladin renunzié da fà pert inće dla comunité todëscia y taliana, canche crëi de podei me sintì sides talian (zitadin dla Talia cun mesamenter buna conosciënza de lingaz y cultura taliana), todësch (südtirolej cun competënza reconesciöda de lingaz y cultura todëscia tiroleja) co ladin. Cun les cualitês y les poscibilitês che nos ladins un, ne oi iö nia avei na sort de "complès de mendranza".

Iö oress podei dì de fà pert dant da döt dla Comunité Ladina, mo spo inće de chëra Tiroleja, Taliana, Europeica y ciodi pa nia dla Comunité di amisc dla musiga o dla Comunité de Gargazon de chëra che i feji pert da feter diesc agn.

Do chëstes conscidraziuns crëii che al sides saurì da capì ciodi che i arati che la rapresentanza dla Comunité Ladina ne dess nia gnì portada inant da en partì ladin (partì etnich), mo che la Comunité Ladina dess avei na istituziun reconesciüda ( che podess inće ester la Uniun Generela di Ladins, mo cun en pëis politich-istituzional bëgn definì), formada da rapresentanć ladins lità democraticamënter y de portignënza politica desvalia, mo che ais un en obietif su, chël de fà le bëgn dla Comunité Ladina. Chësta istituziun dess funzionè alado de en model nü de democrazia direta tres l’internet (Model OLD).

Mi impëgn politich jarà te chësta direziun y la miù prospetiva por arjunje chësc obietif ài odü tl Movimënt 5 stëres, che é por süa natöra a öna cun vigni forma de democrazia direta.

Noeles

Da en sëra ufizialmonter candidat ladin dl M5S, al cuarto post sön lista.

...

Dô trëi agn...nach drei Jahren....dopo tre anni...

vara inant... geht's weiter...si riparte... ...